12-5(sun) salute to 霑叔

12-5(sun)　salute to 霑叔

呢排日日返到屋企又要追睇有關霑叔ｏ既節目．．．真係愈睇愈欣賞佢．．．果然係好有性格＆才華ｏ既一個人！

不嬲都知佢有才華，前幾年去睇煇黃演唱會聽到佢填ｏ既詞，都發覺全部都好耳熟能詳，膾炙人口．．．隻隻都係ｈｉｔ歌中ｏ既hit歌！

話雖如此，之前真係無好認真咁去咀嚼佢ｄ歌詞；即使知道係寫得好，但都無去研究有幾咁好！係到佢死ｏ左之後，重溫番佢ｄ作品，先知道原來真係絕核成咁！大部份人都係到失去ｏ左先識得珍惜，先懂得欣賞．．．無錯，我都係咁ｏ既人！（呢期我部mp3都係播緊煇黃ｏ既歌！）

呢排因為ｏ個ｄ追思霑叔ｏ既節目，聽番好多佢ｏ既歌．．．先發現，oh！原來呢隻係佢寫ｏ架？ｏ個隻都係佢寫ｏ架？

由充滿詩情畫意ｏ既“兩忘?水?”、到豪邁ｏ既“蒼海一聲笑”、“上海灘”、再到充滿愛國愛港情懷ｏ既“勇敢的中國人”同埋“這是我家”、仲有最經典ｏ既“明星”同埋輕鬆淺白o既“問我”．．．真係咩題材佢都寫得咁到肉！點可能有人咁有文采ｏ架？！仲係各方面都寫得咁好喎！

佢不文起ｏ黎可以好不文，但係又居然可以寫出充滿童真ｏ既“世界真細小”．．．有人話呢份中文詞比原裝ｏ既英文版寫得更好．．．我同意！

但係又邊有人寫中文詞寫得咁好，居然連英文詞都咁好ｏ架？！恕我孤陋寡聞，我一直都唔知“L－O－V－E．．．LOVE”係出自佢ｏ既手筆！雖然我不嬲識晒成首歌ｏ既歌詞，但我居然一路都無為意呢隻歌係霑叔寫ｏ既．．．真係失禮晒！我一路都以為係改篇英文歌詞，係洋人作ｏ既，如果唔係無理由寫得咁好ｏ架？！真係枉費我一路都話好欣賞呢隻歌！

亦都再恕我孤陋寡聞，我一路都以為霑叔淨係識寫詞，作曲頂多都係得“蒼海一聲笑”一隻ｈｉｔ歌咁大把．．．但今日聽番霑叔ｏ既生平，先知原來好多歌都係佢一手包辦曲詞，好似“忘記他”、“舊夢不須記”等．．．真係唔講唔知！佢仲又識得彈琴，又吹得一口好口琴，原來仲話佢曾經係“喇叭”ｏ既head boy！邊有人咁“他－lented”ｏ架？！

以前一路都真係無為意，可能ｏ係我長大ｏ既80年代，佢ｏ既形象已經係“不文霑”！所以我印象最深刻ｏ既都係佢主持“今夜不設防”或者“亞姐”ｏ個ｄ！當時佢ｏ既形象的確不甚討好！

不過正如佢個女黃宇詩所講，我都好同意佢話最鍾意霑叔呢幾年老ｏ左ｏ既look．．．好一個慈祥ｏ既長者！

（下篇續）