12-13(sat) 歡樂滿東華2003

“Da da da…Da da da…” (唔知我唱咩呢? 今日咩日子呀? 咪係我o既多年電話鈴聲音樂囉…雖然我大部份時間都係用震機!)

真係話咁快又一年喇, 我仲記得去年今日我o係呢度同大家講話好想可以早一日返香港, 可以睇到當日直播o既歡樂滿東華! 雖然最終我都唔可以即場睇到, 但舊年o既聖誕真係玩得好開心, 又無憂無慮, 又無考試壓力, 又可以日日去玩…真係好耐無過過一個咁care free o既聖誕! 今年就…anyway, 我會苦中作樂!

今日返工d同事已經同我講話今日係一年一度“歡樂滿東華”o既大日子, 問我洗唔洗返屋企瞓個晏覺“養精蓄銳”去撐到零晨4點?! 真係俾佢o地激死!

不過今年我無全日“捕”o係屋企睇直播, 因為買o左飛去睇舞台劇“寒江釣雪”…又幾好睇喎; 簡直係一個舞台劇版“衝上雲霄”…蘇玉華個角色十足十ruby姐, 胡杏兒亦都好似做梗zoe咁…李龍個角色都可以變做sam哥!

雖然話其實年年“東華”都真係無咩特別o野好睇, 今年更加無咩特別吸引o既表演…不過我最鍾意都係睇佢個眾志成城o既感覺, 夜孖孖馬拉松式直播籌款節目…個感覺好live…我最鍾意!

今年d表演項目咁普通, 我覺得應該提議無線搵楊盼盼去爬新落成o既IFC2啦…由節目頭爬到節目尾, 成8個鐘都應該爬完喇啩?! 最多好似以前o個d浸o係水o既藝員咁, 一到廣告就影住佢o地o係d水入面游o下游o下咁囉!

仲有, 一定要撐到零晨3點睇o個個“全台藝員卡拉之星”環節, 因為真係超好笑, 超騎呢! 年年都追住o黎睇…全台最騎呢藝員出盡法寶去搶鏡, 不過都唔見得有任何一個因為呢個環節而真係出到位!

今年d人更加騎呢到唔可以再騎呢, 因為多o左個唔知咩“最出位演繹獎"...d半紅不黑藝員個個施展“渾身解數”…一年比一年更五音不全, 用盡你可以諗到o既誇張動作+唱腔+扮相去爭奪獎項…好可怕呀! 點解無線有咁多咁奇怪o既藝員o架?! 平時都唔見呢d人咁瘋狂o既? 真係餓o左1年, 每年“發作”一次?!

無睇到o既朋友真係一定要嘆走寶喇, 我全家人一邊睇一邊搖頭一邊笑到收唔到聲…係咪香港人真係壓力太大, 搞到癲到呢個地步呀?!