6-14(wed) 再生緣

前一篇講開“偶遇”天王巨星馬國明…點知今日睇張玉珊o個個“修身堂瘦出美麗人生”又見到佢…佢個feel真係好似林家棟, 大家都咁茄喱啡…跟住呢幾日煲“再生緣”, 又見到佢…好可怕呀!

當年睇呢套劇, 完全無為意有佢o既存在, 因為佢仲未受力捧, 只係做d大配角! 其實佢呢個角色都叫有d戲做, 亦絕對記得有呢個角色存在, 但完全唔知o個個係佢囉! 佢第一個令我有印象o既角色, 係o係“律政新人王”度做一個見到d勾爛o左絲襪o既女人就會好興奮o既變態佬…印象咁深刻係因為佢做得好似, 直頭係度身訂造!

今次佢“再生緣”呢個“病wai”角色…亦都幾適合佢…好茄哩啡樣! 不過真係人紅自然好樣d…依家佢點都叫做型過o個時o既!

佢o係呢套戲應該最終會同楊怡一齊…真係o徙o左楊怡…要同佢做一對! 我覺得楊怡o既古裝扮相真係幾靚幾清秀…抵佢有得上位o既!

其實呢套戲o既所有新舊人, 主角或者配角 (好似劉玉翠, 黃宇詩, 莫家堯等) 都做得好好, 古裝劇得o黎又唔老土, 仲幾輕鬆添…同埋d對白都幾搞笑, 真係一套幾高質o既劇!

主要劇情其實只係講孟麗君女扮男裝, 經過一輪錯摸之後, 終於可以同佢最終發現o既心中至愛, 亦即係佢o既指腹為婚老公皇甫少華相認! 中途其實睇得幾煩?, 但又幾好笑…尤其見到林峰懶on直同埋傻氣o既樣, 真係幾抵死! 我個人認為 (唔係, 其實仲係同好多人discuss過o既結論) 林峰真係做得幾討好o架! 佢同葉璇都係做古裝比時裝更討好 (雖然佢o地做時裝劇都唔差, 尤其“律政新人王”?面o既林峰), 因為佢兩個個樣比較古典, 同埋講o野個style都比較文皺皺…可能因為佢兩個o既母語都係普通話啦! 其實我覺得佢o地真係好襯! o係內地. “璇峰”真係好紅, “再生緣”亦真係好hit…唔信大家自己可以上網摷?…不過因為d負面新聞, 香港d觀眾始終對葉璇有偏見, 而林峰亦都好似已經比吳卓羲爬頭…但我始終覺得林峰有料過吳卓羲好多 (雖然我都ok吳卓羲)!

當年葉璇係第一女主角 (擔o既戲仲多過其他男主角添), 但依家反而做配角o個幾個仲紅過佢! 最掂o既當然係胡杏兒啦, 3年前o係呢套戲仲係做暗戀林峰o既大配角, 今年就一年有四套戲上, 係最多產o既女主角! 就算o係“西廂奇緣”, 兩個配角胡杏兒同馬國明都上晒位做男女主角, 胡杏兒甚至仲主角過葉璇添!

楊怡同馬國明今年都有幾部戲上, 反而葉璇依家頂多可以話係停留o係3年前o個個位, 甚至係倒退o左!

仲有, o個個馬德鐘雖然無線依然力捧佢, 俾好多戲佢擔, 但佢真係唔太掂囉! (同埋我真係想講好耐, 佢個名真係好似一個鐘…即係“大笨鐘”之類呢!)“衝上雲宵”之後人氣好似又滑落番, 一d都唔討好, 似番以前做“男主角的情敵”o個種感覺! 個樣好茄喱啡, 好克人憎…依家睇番“再生緣”o個個古裝look, 好唔掂, 好奸, 好煩!

最後我想講, 葉璇o既女扮男裝look真係好睇過佢做番女人個look好多, 佢作女裝打扮反而有d似男扮女裝囉…哈!



以下係我3年前寫關於台慶提及“再生緣”o既o野…原來我當時已經講過對葉璇男裝打扮o既觀感:

3) 躍進女演員: 胡杏兒 or 葉璇 (估計胡杏兒應該機會大d, 因為“流金”o岩o岩播完, 而且一向做弱智角色都出d, 雖然我覺得佢平時做d正常角色都有d似低b! 個人prefer葉璇多d, 好鍾意睇佢同林峰做“再生緣”, 真係做得唔錯…尤其佢個男裝扮相靚過佢做番女仔好多, 演技亦好過胡杏兒! 不過兩個都係力捧緊, 叮噹碼頭, 唔知點估…加埋個人喜好, 我撐葉璇!)

4) 躍進男演員: 林峰 (唔記得陳豪有冇份候選, 如果有, 佢o既機會大D! 至林峰, 雖然我覺得佢似少年魯振順多過少年古天樂; 但無可否認, 佢由一出道已演得唔錯, 由“美味情緣”到“尋秦記”再到“再生緣”, 都演得好好…所以我buy佢; 仲有, 阿利孝和夫人都buy佢嘛!)